E agora si, rematamos coas 4 semanas de compromiso co galego.
Agardamos que gozásedes da experiencia de achegarvos aínda máis a nosa lingua e que vos animedes a seguir empregándoa no voso día a día.
PARABÉNS A TODAS E A TODOS!
MOITAS GRAZAS POR ACOMPAÑARNOS NESTA AVENTURA UN CURSO MÁIS!
Como xa activastes os superpoderes do MODO GALEG , este é un bo momento para lle lembrar ás profesoras e profesores a súa parte do trato! Gozade moito dos vosos merecidos premios!
Antes de nos despedir, querémosvos agradecer o esforzo e dedicación destes días, no nome da Real Academia Galega e do Concello de Ames. O alcalde de Ames e o presidente da RAG pedíronnos que vos fixeramos chegar a seguinte mensaxe: gustaríanos que os nenos e as nenas do concello deixaran o modo galego activado para sempre!
Tamén queremos darlles os parabéns e agradecerlle o compromiso, o esforzo incansable e participación activa no programa ao profesorado da EEI O Milladoiro, do CEIP Barouta, do CEIP Agro do Muíño, do CEIP A Maía, das EEI de Covas e A Igrexa e das escolas infantís municipais A Madalena e O Bosque. Estendemos este agradecemento aos profesionais dos servizos complementarios, ás ANPAS e ao conxunto das familias. E vaia un recoñecemento especial para os Equipos de Dinamización da Lingua Galega de todos os centros.
E, por suposto, un “superagradecemento” e unha salva de palmas para todas as nenas e nenos que o deron todo para que o MODO GALEGO estea activado en todos os ámbitos da nosa vida. Este programa non sería posible sen a vosa participación e compromiso.
Por último, temos que darlles as grazas a todos os colaboradores e colaboradoras que nos enviaron mensaxes audiovisuais capaces de inspirar e motivar os nenos e nenas do Concello de Ames para manter activado o modo galego. Nesta edición volveron participar con nós moitas persoas queridas: o presidente da RAG, Víctor Freixanes; o alcalde Ames, Blas García; o Apalpador e o Pandigueiro; o director do IES do Milladoiro e músico, Manolo Maseda; o músico apaixonado dos instrumentos, Cé Orquestra Pantasma; a actriz de dobraxe, Antía Castro; a comunicadora e cantante da orquestra Panorama, Fátima Pego; a contadora e actriz Bea Campos; o pallaso máis comprometido e solidario, Peter Punk; o músico, actor e contador, Paco Nogueiras; o especialista en toponimia, Vicente Feijoo; o músico e director do CEIP Barouta, Alonso Caxade; a creadora de contidos @Konachadas, Nuria Grandío; a narradora oral, Vero Rilo; o grupo musical de cantareiras e pandeireteiras As Tanxugueiras; o propio Son Goku na voz do dobrador veciño de Ames Antón Rubal, e o grupo de música tradicional amesán, As Maianas. Grazas de todo corazón por formar parte deste proxecto!!!
