MODO GALEGO. ACTÍVAO!
MODO GALEGO, ACTÍVAO! é un proxecto de investigación-acción deseñado e desenvolvido pola Real Academia Galega en colaboración co Concello de Ames e coa participación da súa comunidade educativa. Con el, queremos explorar xeitos mellores de dinamizar a lingua galega nas novas xeracións, poñendo a proba ideas novas, adaptando outras xa existentes, e analizando sistematicamente os seus resultados.
O proxecto botou a andar no ano 2021, tras a publicación do Mapa sociolingüístico escolar de Ames un amplo traballo de investigación que nos permitiu establecer a diagnose de partida. Dende aquela, baixo o paraugas do Modo galego, actívao! tiveron lugar moitas e diversas accións –actividades formativas e de divulgación, de dinamización lingüística, edición e publicación de materiais etc.– orientadas á rapazada, ás familias e ás e aos profesionais da educación formal e non formal.
En que consiste o programa de compromiso lingüístico?
Entre estas, unha das máis vistosas é o programa de compromiso lingüístico de tres semanas levado a cabo no curso 2022/2023 e no que participou alumnado de educación infantil e primaria de todo o concello de Ames. Inspirado noutros programas de compromiso, e especialmente nos 21 días co galego e + , adoptáronse dinámicas xa coñecidas e creáronse outras novas adaptadas ás características á poboación obxectivo do Modo galego, actívao! así como aos intereses da investigación sociolingüística. O resultado final tivo tan boa acollida que as institucións e os centros participantes quixemos reeditalo este curso, mantendo aqueles aspectos que mellor funcionaron na pasada edición e introducindo novas ideas e melloras froito das primeiras avaliacións de resultados.
O obxectivo central desta actividade é sinxelo: animar a toda a comunidade educativa de Ames (alumnado, familias, o profesorado e persoal dos servizos complementarios) a empregar, durante tres semanas consecutivas, a lingua galega o máximo posible e en todos os contextos. Para isto establécese un compromiso e propóñense diversas actividades e dinámicas que faciliten cumprir o reto. Todo isto articulado a través duna páxina web que se actualizará diariamente mentres dure o desafío.