Mércores 15: o galego nas redes

Como seguro xa sabedes polo ano pasado, o galego atopou na rede un espazo onde medrar e establecerse. A día de hoxe contamos con creadores de contido en Youtube, TikTok, Instagram ou Twitter/X. Tamén atopamos contido en galego froito do auxe dos podcast ou da explosión do vídeo en tempo real a través de Twitch, entre outros moitos formatos.

E non só contamos con estas creadoras e creadores, senón que conseguimos que plataformas coma Twitter e Facebook estean dispoñibles en galego. Isto é un logro, xa que estes sitios non adoitan estar en moitos idiomas alén dos catro ou cinco máis falados.

É importante que este uso continúe aumentando para que as plataformas recoñezan o noso idioma en igualdade coas demais linguas.
E vos, tedes redes sociais? Que lingua usades nelas?
En que lingua tedes os vosos dispositivos na casa (ordenadores, teléfonos ou tabletas)?
Sabiades que todos eles se poden configurar en galego?
Que podedes facer vós para axudar a que o galego medre nas redes e na tecnoloxía?
Animádesvos a intentalo?

Antes de seguirmos, imos escoitar a unha presentadora e produtora de Antena 3 que vos envía un saúdo e moito ánimo para o reto que estades facendo:

Agora toca escoller entre estes dous RETOS. Imos facer a nosa propia versión do que dous influenciadores do galego fan nas súas redes sociais:

Recitar algún dos contidos que estades a aprender en forma de canción: Aquí vos presentamos o trap de Miguel Silva, graduado en lingua e literatura galega, músico e coñecido nas redes como AQUEL-E . Neste vídeo Miguel axúdanos a lembrar o uso correcto dos pronomes en galego. E vós, sabédelos colocar ben?
Gravar as palabras que nos gustarían que se empregasen máis en galego, como fai María Rúa, coñecida nas redes como @prado_rua, no seguinte vídeo.

E a vós, que palabras en galego vos gustaría que se empregasen máis? Se non se vos ocorren, podedes preguntar ás persoas maiores ou acudir á seguinte ligazón onde se presenta unha iniciativa da Asociación de Escritores e Escritoras en Lingua Galega (AELG) que recupera palabras en perigo de extinción e tamén palabras e expresións que non recollen os dicionarios.

Se queredes coñecer máis sobre @prado_rua podedes ler a seguinte noticia que acaba de saír o mes pasado. María é unha auténtica influenciadora!

Rematamos cunha curiosidade para os nenos e as nenas que esteades a recoller refráns e ditos. Presentámosvos un refrán en éuscaro: “Adiskie onekin, orduak labur”. Traducido ao galego significa que, cun bo amigo, as horas fanse curtas. Atopastes vós algún dito ou refrán sobre a amizade? E se imos a procura dalgún e o colgamos na nosa aula?

Para Educación Infantil

Hoxe imos a falar do tempo que é todo o que acontece no ceo. Pode estar soleado, chuvioso, ventoso ou mesmo nevado! Imaxinade que saídes a rúa e como vos sentiriades cando:

O sol se achega a vós cos seus raios quentiños
Aparecen as nubes no ceo e comeza a chover
O vento empeza a soprar
A neve cae e cobre todo cun manto branco

O tempo é coma un xogo que cambia cada día. Podemos observalo e sentir os seus emocionantes cambios. Podemos xogar co vento coma as árbores cando bailan ao seu ritmo, ou facer bonecos e lanzar bólas de neve coas nosas amigas e amigos.

Apetécevos aprender máis sobre o tempo?

Nesta ligazón tedes unha chea de léxico relacionado co tempo meteorolóxico.

Tamén podemos cantar a canción “o tempo meteorolóxico” de Magín Blanco: